رحلة الي اصغر ما في الكون الذرة

 

-ياصاحبي

=نعم

-انا سمعت انك كنت شاطر في المدرسة و عاوز اسألك سؤال كدة 

=هو أنا مكنتش شاطر بس اسأل.. ربنا يستر 

- انت سمعت قبل كدا عن أساس المادة ونشأتها ومكونات أساسها

=الله انت بتقول ايه يعم أساس ايه ومادة ايه وايه الكلام الكبير دا

-يعم ولا كبير ولا حاجة وانت على فكرة سمعت بس انت مش فاهم او مش فاكر ايهما اقرب يعني

=والله شكلي مش فاكر قولي كدا يمكن افتكر

-بص يسيدي اي مادة في الدنيا ليها أساس وأساسها هو الذرة 

=ايوا يعني انت  هتكلمني عن الذرات متقول يعم من الاول انت توهتني معاك 

-طيب معلش خليك معايا 

=كمل

-الذرات دي بقا الوحدات الأساسية للمادة يعني أساس المادة من الاخر   وهي هيكل المادة يعني لولا الذرات مش هيبقى للمادة وجود, معلش بقا كدا هسألك سؤال بسيط 

=اتفضل يسيدي

-ايه هي اصغر شئ في الدنيا دي ؟

=الذرات اللي انت بتتكلم عليها

-جدع غلط

=ازاي يعم دا انا دارسها كدا

-يراجل احنا هنهزر انت مسمعتش قبل كدا عن حاجة اسمها نواة الذرة ولا حاجة جوا نواة الذرة اسمها بروتونات ولا نيترونات ولا حتى حاجة اسمها الكترونات  بس دي مش جوا النواة دي في الذرة نفسها بس في حاجة اسمها السحابة الالكترونية

=ما براحة شوية يعم انا اه افتكرت الحاجات دي انا شكلي ضايع 

-مهو باين

= بس انا عندي تعليق الا قولي ايه هي السحابة الالرتكلنية دي

-يعم ايه اللي انت بتقوله دا اسمها سحابة الكترونية ودي زي فراغ موجود فيه الالكترونات ودا بردو اللي هو قطر السحابة الالكترونية اد 10000 مرة من النواة يعني شوف حجم النواة صغير ازاي مابالك بقا بالبروتون والنيترون اللي فيها  فهمت حاجة؟

=ايوا والله سبحان الله 

- تعالى بقا قبل ما نعرفك بقا بشوية الحاجات  اللي موجودة في الذرة تعالى نعرف الذرات دي بدأت تتكون امتى

=تمام كمل

-بص يسيدي الذرات دي بدأت تتكون من حوالي 13.7 مليار سنة 

=يااااااااه ايه يعم دا دا كتير اوي

-مهو لازم يبني الكلام دا انشئ مع بداية نشأة الكون

=اه قصدك الانفجار العظيم!!!

-الله ينور عليك كويس ان انت مركز معايا بص بقا يدوبك حصل الانفجار من هنا وشوية كدا حوالي كم دقيقة واتكونت الكواركات والالكترونات ودي نتيجة البرودة لان الكون كان حار جدا ودا شئ بديهي بعد الانفجار

=مكلمتنيش انت عن حكاية الكواركات

-اه تصدق بص يسيدي الكواركات دي حاجات اصغر من الالكترونات والبروتونات والنيترونات  بتتكون مع بعضها عشان تدهملك

=الله دا كمان في اصغر منهم يحلاوة 

-والله اعلم يمكن يكون في اصغر من كدا 

=طب كمل اما نشوف آخرتها

-تعالالي بقا اقولك واعرفك على الحاجات اللي في النواة في الذرة

=ايوا بقا يعم انا مستني الحاجات دي

- بص يسيدي البروتونات والنيترونات دي تقريبا ليهم نفس الكتلة  فلو واحد منهم جيت تقارنه مع كتلة الالكترون هتلاقيه تقريبا اكبرمن كتلة الالكترون بحوالي 1835 مرة 

=ياااه للدرجادي 

-اكيد اوماال انت فاكر ايه 

=الله أكبر كمل اشجينا

-بيقولك بقا ايه  ان الذرات دي ديما تحتوي على عدد متساوي من الالكترونات والبروتونات  وركز في دي عشان متتلغبطش وعادة

=وايه

- وعادة.... البروتونات والنيترونات يكونو اد بعض

=اه تمام كمل كدا يبقى عدد البروتونات والالكترونات ديما متساوي وعدد البروتونات والنيترونات ساعات بيكون متساوي

-ايواااا الله ينور عليك وبص بقا الذرة دي لما تيجي تضيف لها اي حاجة من البروتونات او النيترونات بتتغير

=بتتغير كليا!!؟

-مش بالضبط لما تيجي تضيف لها بروتون بتتحول الى عنصر جديد تماما 

=ما انا قولتلك اهو بقا 

-يبني اسمع الكلام لأخره ولما تيجي تضيف نيترون بتتحول لحاجة اسمها نظير 

=اه تمام معلش قاطعتك

-ولا يهمك تعالى نكمل

=بس معلش هو ايه النظير دا ؟

-النظير بيبقى مجرد نيترون زيادة في النواة ومبيغيرش حاجات كتير والذرة بتتقل ساعتها

=اه مانت قولتلي ان النيترونات اكبر بكتير من الالكترونات فطبيعي ,تمام كمل

-خلي بالك انك ممكن تقيس كتلة الذرة بكتلة النواة

= والله!؟ بكتلة النواة بس؟

-مش بالضبط بردو ,وبعدين هو انت لحقت تنسى مش انا قايلك ان البروتونات والنيترونات دول اد بعض في الكتلة تقريبا  واكبر بحوالي 1835 مرة من الالكترونات متصحصح معايا بقا فتقريبا بتبقى كتلة النواة هي كتلة الذرة مش بالضبط فهمت؟ 

=اه ,والله معلش سرحت منك كدا

-طب بص يا سيدي أنا هقولك على حاجة ممكن تستغرب منها شوية 

=قول انت النهاردة خلتني استغرب كتير اتحفني 

-تعرف انك ممكن تولد الكهرباء من الذرة و إن الالكترونات ليها عامل كبير جدا في الموضوع ده 

=بجد! طب كمل الموضوع

-لأ بقي مش المرادي دي محتاجة قاعدة لوحدها و تكون مركز معايا يا زمالة اكتر من كدة لإننا هنقول فيها معلومات تخليك كبهير تنبهر 

=ماشي يا عزيزي نبقي نقعد تاني في اقرب وقت