الحقيقة وراء تفاحة نيوتن

 خد رايح فين هاخد من وقتك خمس دقايق هحكيلك عن أساطير و خرافات علمية، ثواني  عارف هتقولي إنت أهبل ازاي أساطير علمية هقولك كمل الموضوع و انت تعرف....

الأول قبل اي حاجه أهلا بيك، بنتمني تكون بخير زي ما سبناك المرة اللي فاتت، هنتكلم في بوست انهارده عن حاجات غريبه جدا اتمني تركز كده عشان نستفاد كلنا .

نيوتن والتفاحة !!

مالهم نيوتن والتفاحة بتاعته دي حتي تفاحته دي كانت سبب في اكتشاف الجاذبية .

= متأكد ان التفاحة دي سبب الجاذبية وأنها مش أكذوبة أو أسطورة علي مر التاريخ؟ 

يا عم أسطورة اي انت بتهبد احنا درسناها في كتب المدرسة والمدرسين قالولنا كده ازاي يعني كلامك ده .

= ركز معايا طيب قصة التفاحه دي من أكبر احتمالاتها إنها أسطورة اصلا كتير من العلماء بيعتبروها أسطورة خيالية ليس لها أساس من الصحه اطلاقا .

بصراحه معرفش اصدق مين اللي درسته في الكتب والأساتذة والناس ولا اللي بتقوله ده !!

= متصدقش حد غير لما تدور بنفسك هي ممكن تكون حقيقه فعلا بس الحقيقة دي لازم يكون ليها أدلة واثباتات بس مفيش اي إثبات بيدل علي أنها حقيقة غير الكلام اللي اخدناه في الكتب، طب لو هي حقيقة فعلا لي السير نيوتن محكاش  القصة دي في أي من كتبه أو مقالاته اللي بتخص الجاذبيه مع انه اي عالم مكانه هيشرح ازاي فعلا اكتشف كده وحاجة زي دي مش هتفوت علي بال السير اسحاق نيوتن  وضحلي؟!!

معرفش بس اللي اعرفه انه لو فعلا كده ومش حكاية التفاحه امال كان هيعرف الجاذبية ازاي ؟؟!

=كتير من العلماء قالوا إن الأساليب العلمية هي اللي مهدت لنظرية نيوتن في قانون الجاذبية العام أنه ورث عن جيله العظيم أفكار علمية ناضجه خلفها له كوبرنكس وكليبر . ودعم هو أسسها بعقله الفذ .

اللي فهمته منك كده أنه التفاحه مش اصل الجاذبية وأنها أسطورة صح؟!

= لا غلط طبعا .

يا عم انا معنتش فاهم حاجه انت متناقض كده ليه!!

=انا مش متناقض خالص انا بوضحلك كل حاجة اتكتبت عن الموضوع ده وبعرفك عشان متفضلش ماشي ورا وهم تعتقد أنه صح لا ندور ونعرف كل الأطراف اللي تخص الموضوع ، بالمختصر كده افتح عقلك وركز معايا في أقاويل كتيرة من الناس بتقول أن التفاحه والجاذبية حقيقة وفي بعض من العلماء بيقولوا كده فعلا حيث وضح كتاب " السرنديبية " اللي بيشرح أي اكتشاف علمي جه بالصدفه كده واللي ألفه ريستون إم روبرتس وضحوا فيه ان كتير من المصادر بتدل أن ملاحظة نيوتن لسقوط التفاحة السبب في معرفة ان في جاذبية و كمان فولتير اللي سمع القصة من كاثرين بارتون ابنة اخت نيوتن وزوجها أيضا وصديق نيوتن المقرب الدكتور ويليام ستيوكلي وهو كان فيزيائي وكمان علي الرغم من إن رواية فولتير للقصة هي الأشهر إلا أن كتاب الدكتور ستيوكلي واللي كان بيتكلم عن حياة نيوتن كان أكثر مصداقية .

من الاخر  هل حوار التفاحة   حقيقة او لا عشان انت دوختني؟؟؟

= الحقيقة الكاملة عند نيوتن في علم الغيب تعتبر لانه موثقهاش بنفسه وبالتالي احنا هنخرج من هنا مستفيدين كذا حاجه أهمهم اي معلومة نعرفها ندور عليها ونعرف كل أطرافها عشان لو مش عملنا كده هنبقي جهلة فعلا وبناخد المعلومه من مصدر واحد وكمان احتمال مش موثق .

في النهاية اتمني تكون استفدت ولو معلومة بسيطه نلقاك علي خير♥️